About Us

CBMC Khrihfabu Thawhkehnak Tuanbia

Chungkhar Pumhnak

Washington DC, Maryland le Virginia area ah 1990 hrawng in Hakha holh hmang Laimi a rak um chun cu Pu Roland Maung lawng a si. 1996 hrawng ah mi dang tlawmpal an hong phan. An zapi tein Dr. Vum Son inn ah an rak um hna. Kum 1997 ah Pu Roland Maung nih Fort Washington, Maryland State chung ah inn a cawk. Cu ka ahcun pa lawng te minung 7 an um tti hna. An zapi tein Korea dawr ah Zarhpini zong din lo in rian an rak ttuan caah pumhnak caan an rak ngei kho lo. Pu Mang Cung Nung le Pu Rual Uk hruainak in chungkhar pumh thlacamnak kha Zarhpi zan poah ah an tuah tawn. Mawtor hna an van ngeih in rian dang tete an hun ttuan cio tik ah Khrihfabu chungtel sinak an rak kawl. Mi cheukhat Mizo holh a thiam deuh mi cu Mizo Presbyterian Church ah an i pum. Cheukhat Kawl holh ai ziak deuh mi cu Calvary Baptist Church, Washington DC ah an i pum ve.

Lai Holh Tein Pumhnak

1997 kum dongh lei ah mi dang an hun i chap deuh i, Pu Lian Uk le a hawi le nih Washington DC ah inn an hlan. Pu Lal Bat le a hawi le nih Rundai ah inn an hlan ve. Cu ticun inn thum an hung si cang. Pumpak thlacamnak tuah a duhmi tete nih sawm in pumh thlacamnak cu tuah pah lengmang a hung si. Hlasak a thaw i thlacam zong a nuam chin lengmang. Cutikah Lai holh tein pumhnak ngei dingah zapi duhnak in bia a tlu. Cu Laiholh pumhnak ah cun Pu Zo Tum Hmung, Pu Lal Bat, le Pu Roland Maung hi tawlreltu ah an rak fial hna. Anmah pathum hruainak in pumhnak cu thla khat ah voikhat in inn kip ah i tthial lengmang a rak si.

Chin Christian Service (CCS)

June 14, 1998 ah 1218 G Street, SE, Washington DC 20003, Pu Lian Uk te an rak umnak inn ah pumhnak a um. Pumh dih in meeting tuah a si. Kan i pumhnak bu a min ah “Chin Christian Service” (CCS) siseh tiin zapi hnatlaknak in a min bunh a si. August 30, 1998 ah cuka hmun tthiam ah cun pumhnak le meeting tuahnak a um than. CCS hruaitu dingah minung panga thim an si: Pu Rual Uk (Hotu) ; Rev. Philip Hrengling (Hotu bawmtu); Pu Roland Maung (Chungttuan); Pu Mang Cung Nung (Chungttuan bawmtu); Pu Lal Bat (Ngunkeng) tiin thim an si.

CCS hi Khrihfabu taktak a tling lo nain Khrihfabu bantuk tein a cawlcang kho. Thla khat ah voikhat; zarh donghnak poah ah pumhnak ngeih a si. Pumhnak paoh ah zanriah dum tti nak ngeih zungzal a si. Thla khat ah voikhat pumh tawnmi lawng si loin lawmhnak le ngaihchiatnak a tongmi hna an um tikah lawmhpinak le ngaihchiatpinak thlacam pumhnak tuah lengmang a si fawn. Minung kan tam chin lengmang bantuk in tthitumh duh mi, tipil in duh mi, tiin biaknak phunglam taktak in tuah a herh mi a hong um len. Cucaah Khrihfabu lawlaw in dirh si seh timi ruahnak a hung um. Khrihfabu dirhnak dingah District of Columbia Baptist Convention (DCBC) cu February 1999 hrawngin rak fuh asi. DCBC nih “Minung tlawmte nan si zongah Khrihfabu cu dirh khawh a si ko, kanmah nih a herhning bantukin kan in bomh hna lai” tiin an rak kan dirkamh ve. Khrihfabu dirhnak kong he pehtlai in voithum renglo meeting kan rak tuah. A ngamh ngai mi um asi bantuk in biasi a phai mi zong um a si ve. Thil ttha a chuah lai ahcun upa pipi zong hmai chia tiangtiang in bia al nak a rak um tawn. June 6, 1999 ah laikhal tlangval 7 umnak hmun Rundai ah pumhnak ngeih a si. Rev. Edmund Za Bik hi Princeton ah visiting scholar in a um lio a si i, D.C lei a rak tlawn lio a si. Amah nih thawngttha a kan chimh. Bawipa zanriah zong a kan pek. Pumh dih in meeting tuah a si i, Khrihfabu cu dirh si ko seh tiin biakhiahnak tuah a si.

Cu hnu ah DC area chungah a ummi Teddim, Falam, le upa dangdang zong sawm in Pu Mang Cung Nung inn, Gaithersburg ah meeting tuah asi tthan. Mah holh te in Baptist Khrihfabu dirh a herhnak kong chim asi hlei ah midang zong rak itel cio ding ah sawm an si. Sawmmi upa dang cio zong nih, tha peknak le hnatlakpinak bia an chim cio. A hnu bik ah, Lai holh hmangmi Baptist Khrihfabu cu dirh dingah lungtlin pi cio asi. Aa tel kho rih lo zong nih kan in dirkamh hna lai, kan in theihpi hna lai, tiah tha peknak le biacah an kan chimh. Cu caah CBMC hi DC kiangkap ummi Laimi upa vialte theihpinak in dirh mi asi.

Khrihfabu dirh dingah hnatlaknak ngeih a si hnu ah, Rev. Philip Hrengling cu biakinn kawl ah a herhning bantukin a cawlcang. Biakinn hmun pahnih thum an hmuh mi lak ah Laimi caah hmuh laili bik asi mi Luther Rice Memorial Baptist Church cu va nawl ding ah lungtlin asi. August 3, 1999 ni ah D.C Baptist Convention ah Ethnic Group Mission Khrihfabu thar a tlaitu Rev. Dr. Joshua M. Tran he Luther Rice Memorial Baptist Church cu an va chonh hna. Luther Rice hi Kawlram ah Missionary hmasa bik Judson Siangbawipa a rak thlahtu a si caah lungtho ngai le siang ngaiin pumhnak hmun cu onh a rak si.

August 29, 1999 ni ah Pu Joseph Hram Hlun te inn (Riverdale, Maryland) ah Chin Christian Service a hmanung bik pumhnak tuah a si. Kawlram lei in a rak tlawngmi Rev. Lam Cin Thang nih thawngtha a chim. Pumh dih in Khrihfabu kong meeting tuah a si. Kan biachahmi cu; 1. Kan Khrihfabu min ah “Chin Baptist Mission Church” ti siseh; 2. Kan i pumh caan cu zaanlei mi tam deuh tlin bik caan suimilaam 4:00 pm in thok siseh tiah biakhiahnak tuah a si. Sushi tuahmi le chunhlan riantuan an tam caah chunhnu kan thimnak hi asi.

Chin Baptist Mission Church

September 12, 1999 ni zaanlei suimilaam 4:00 pm ah Luther Rice Memorial Baptist Church ah a voikhatnak CBMC pumhnak cu thok a si. Rev. Dr. Joshua Tran nih thawngtha a chim. Khrihfabu caah thluachuah a kan halpiak. Hi ni ah hin aa pummi dihlak ngakchia he minung 45 kan si. Khrihfabu dirh lio ah hin inn dawng in dawng 10 kan rak si. A minung in 56 kan rak si. A changtu zarh September 19, 1999 ah a voihnihnak pumhnak ah Rev. Dr. Si Khia nih thawngtha a chim. Pumh dih in Khrihfa upa thim a si. Hruaitu 5 pin ah Pu Rollin Van Bik le Pu Zo Tum Hmung thim chap an si. October 3, 1999 ni ah Khrihfabu dirhnak lawmhnak thlacam pumhnak hlunghlai ngaiin tuah a si. DC Baptist Convention ah Mission & Evangelism Director Rev. Dr. Robert Cochran nih thawngtha a chim. Rev. Philip Hrengling nih Khrihfabu aa thawknak tuanbia a chim. Pumh dih in lawmhnak zaanriah i hrawmtinak ngeih a si.

January 2000 in Khrihfabu tling i hruainak ding phunghrampi le phungtengnge (Constitution & By-law) ser a si. February 6, 2000 ni ah Khrihfabu tling i hruai phungning tein Khrihfa upa minung 8 cu a tanglei bantuk hin thim an si:

  1. Pu Mang Cung Nung (Hotu)
  2. Pu Roland Maung (Hotu bawmtu)
  3. Pu Rual Uk (Chungtuan)
  4. Pu Tial Hoo (Chungtuan bawmtu)
  5. Pu Lal Bat (Tangka kawl chungtuan)
  6. Pu Thawng Za Lian (Ngunkeng)
  7. Pu Van Thawng Cung
  8. Pu Siang Kung.

February 27, 2000 ni ah Khrihfabu a zohkhenhtu dingah Rev. Philip Hrengling cu caan cheu riantuantu dingin lak a si i, kum khat le cheu renglo a tuan. March, 2000 chungah nubu he mino bu ser a si i, riantuantu 5 veve in thim an si. Mino nih thazaang tam deuh kan herh an ti caah minung 2 an fial chih hna i, a hnuah 7 an hung si.